Садык Шер-Нияз: “Мандатымды албай жатышса, жаш балача ыйламак белем?”
Бир аз күн мурун Жогорку Кеңештин депутаты Садык Шер-Нияз социалдык баракчада: “БШКга баратам. Депутаттык мандатымды тапшырам. Биринчиден, менин бул чечимиме үй-бүлө, бала-бакырам ынанды... Экинчиден, “Ата Мекен” партиясынын лидери Өмүрбек Чиркешович Текебаевге өз ордумду берем” дегендей билдирүү тараткан эле. Ал эми кечээ ЖКнын кезексиз отурумунда Садык Шер-Нияз депутат катары жүргөнүн, кадимкидей легитимдүү (азыр ушинтип сүйлөп калдык) добуш берип атканын байкадык. Ушундан улам кыскача эки суроо берип, жообун тыңдадык.
-- Садык иним, мандатыңыз эмне болду?
-- Өзүңөр билгендей, БШКга барып өз ыктыярымда мандатымды тапшырып, ордумду партия лидери Өмүрбек Текебаевге бошотмокмун. Тилекке каршы, алар менин мандатымды албай коюшту, кабыл алышпады.
-- Себебин айтыштыбы?
-- Ак дешпеди, көк дешпеди, “болбойт” деп так кесе жооп айтып туруп алышты. Себебин да түшүндүрүшпөдү. Анан эми “болбойт” деп атса, жаш балача, эшигинин алдына отуруп алып ыйлап көшөрбөдүм.
-- Ал эми Өмүрбек Чиркешовичтин маселеси кантти?
-- Кантмек эле, “отпадает” болуп калды... Баары мурункудай калды.
Сурат Жылкычиев
"Азия Ньюс" гезити
