Чек аранын жабылышы – Токаевдин кыянаттыгы...
Кыргыз-казак чек арасында, “Ак-Тилек” өткөрмө бекетинде олуттуу көйгөй жаралды. Оор жүк ташуучу беш жүздөн ашык унаа бир канча күндөн бери өтө алышпай, кыйналып аткан чактары. Казак бийлиги баңгизат операциясына шылташып, кыянаттык жасагандай түр көрсөтүштү. Ириде ачык айтышпаганы менен кыргыз тараптан суу кетпей атканына жооп кылышкан окшойт. Албетте, бул акылга сыйбаган көрүнүш. Таластагы Киров суу сактагычы какшып, Казакстанга акпай калган. Расмий Бишкек атайын жасап жаткан жок да, табигаттын кризиси жаралса кантебиз? Тилекке каршы, Касым-Жомарт Токаев президент катары алысты көрө билген, адилеттүү позицияны карманбай, коңшу өлкөгө далысын салгандай кадамга барууда. Качан суу токтогондо чек арасын жаба салуу логикага сыябы? Оор жүк ташыган жүздөгөн унаалардагы жер-жемиштер, азык-түлүктөр мерчемдүү жерине убагында жетпесе, баары чирип, банкроттук абал жаралат. Канча деген ишкерлердин мээнети күйүп кетет? А айдоочулардын азап чеккени, күнүмдүк чыгымдарычы? Ооба, эки ортодо оор шарт жаралды. Жөнөкөй, түшүнүшө турган жагдайда казак бийлиги кастарын тигип, кылдан кыйкым издеп турганын карачы...
"Азия Ньюс" гезити
