Жалгыз Ташиев УКМК менен коррупцияны түп-тамырынан кыя чаап салууга жетишпей атат
Соңку айларда УКМК коррупцияга каршы катуу күрөшүүдө. Башкы прокурор Курманкул Зулушевдин бир тууган кайниси, “атажуртчу” депутат Надира Нарматованын баласы кармалды. Экөө тең бажы кызматында иштеп атышып, ири суммаларга айыпталганы маалым. Ал эми Тенгиз Бөлтүрүк 800 миллион 84 миң сомду мамлекетке кайтарып, бошотулганы белгилүү. Токмок мэри Урмат Самаев 25 миллион сом “кусуп”, эркиндикке чыкты. Таянган тоолору, калканчтары болсо да, УКМК төрагасы Камчыбек Ташиев эч нерсесине карабай, мамлекетке, элдин ырыскысына зыян келтиргени үчүн жазалап жатат. Булар жакынкы аралыкта эле камалышкан “лөктөр”. Мындан сырткары жума сайын “Кызмат абалынан кыянат пайдалануу”, “Коррупция” беренелери менен чиновниктер кылтакка илинишүүдө. Бирок, жалгыз Камчыбек Ташиев УКМК менен коррупцияны түп-тамырынан кыя чаап салууга жетишпейт экен. Органдардын биргелешип кызматташуусу, анан уурулукка каршы чыныгы кесипкөй, таза жетекчилер жана коомчулук да жардам берүүсү шарт.
"Азия Ньюс" гезити
