Акыркы кабарлар
» Саясат » Айбек Жунушалиев өзүнүн отставкасы боюнча комментарий берди
Айбек Жунушалиев өзүнүн отставкасы боюнча комментарий берди
08-февраль, 18:18
Бишкектин мэри Айбек Жунушалиев Kaktus.kg'ге “отставкага кетет” деген имиштер боюнча комментарий берди. Анын айтымында, ал бул тууралу эч нерсе билбейт.
"Мен азыр жумуштамын, президент менен объектилерди текшерип жатабыз. Бул боюнча эч кандай маалыматым жок. Жумуш штаттык режимде уланууда" дейт борбор шаардын жетекчиси. Ал аны менен отставка боюнча эч ким сүйлөшпөгөнүн белгиледи.
Эске салсак, Жунушалиев 2021-жылдын августунда мэрдин милдетин аткаруучу болуп дайындалган. Ошол кезде мэрдин милдетин аткарып жүргөн Таалайбек Сарыбашевдин ордуна келген. Сарыбашев болгону 10 күн Бишкек мэринин м.а. болуп, кийин отставкага кетип калган. Бул кадамын "себептерим бар" деп түшүндүргөн. Азыркы тапта ал Жогорку Кеңештин депутаты.
2021-жылдын 26-августунда Бишкектин мэрин шайлоо өтүп, Айбек Жунушалиев жалгыз талапкер болгондуктан, жеңүүчү болуп чыгат. 3-сентябрда расмий түрдө иштеп баштаган. Борбордук шайлоо комиссиясынын мүчөсү Айдана Жупуева ага “шаардын мэри” деген күбөлүк тапшырган.
