Бай партиялар элди тажатты, алардан “Ата Мекендин” артыкчылыгы эмнеде?
11-июлда өтө турган шаардык кеңештин шайлоолоруна НДПК, “Эмгек”, “Улуттар Биримдиги”, “Ынтымак, “Ата Журт – Кыргызстан” ж.б. партиялар кайрадан чыгып алышып, элдин кыжыры менен ойногону калышты окшойт. Дал ушулардын өкүмзордугу, мыйзамсыз аракеттери үчүн Бишкек, Ош шаардык кеңештерине болгон шайлоо жыйынтыктары жокко чыгарылган эмеспи! Мансап үчүн амбициялары ашынып, элди сатып алууга, басмырлоого болгон аракеттерин кантебиз? Ооба, коомчулук эми олуттуу баа берет... Мындай шартта “Ата Мекен” партиясы курамын таза сактап, ыплас оюндарга аралашпай, арканды алыс ыргытуу менен күздөгү парламенттик чоң мөрөйгө аттанарын эшиттик. Бул алгы кеп. Ага чейин жогорудагы олигархтардын уюшмалары элдин элегинен өтүү менен кайрадан жүздөрүн ачышары, биротоло жек көрүндүгө айланышары ажеп эмес. Мындай шартта “Ата Мекен” Жогорку Кеңештин шайлоосуна жаңылануу менен аттанса, Өмүрбек Текебаевдин саясаттагы кеменгерлигине дагы бир жолу ынанабыз.
"Азия Ньюс" гезити
