Эски бийликтин кадрларынын тазасы эле генерал Талант Салиев беле?
“Убагында Абдил Сегизбаев мага куугунтук жасаган, бирок мен УКМКнын 1-орун басары болгондо кек сактабай, баарын кечиргем” деп генерал Талант Салиевдин айтып калмай жагы бар. Оомал-төкмөл дүнүйө тура, кечээ кызматтагы адам бүгүн жок, айрымдары түрмөлөрдө... Сооронбай Жээнбековдун кадрлары жарым жылдан бери эле коррупцияга шектелишип, айрымдары качышты, калгандары шагырап эле камалып жатышат, “кускандары” чыгышууда. Мисалы, Курманбек Дыйканбаев, Мухамметкалый Абылгазиев, Самат Кылжыев, Азамат Араев, Бакир Тайыров сыяктуулар коррупцияга айыпталып кармалышса, айрымдары тымызын түрдө экономикалык амнистиядан өтүшкөндөрүн кантебиз? Көмүскө жайдан жансоогалагандар миллиондоп төгүштүбү? Айтор, Сокенин айланасы ирип-чирип кеткендей элес жаратып калганда, кантип эле бирин-экин тазасы чыкпасын? Биз тыкыр көз салып көрсөк, Талант Салиев УКМКнын 1-орун басары катары таза иштеп, 6-октябрдагы төңкөрүштөн кийин кызматын тапшырып, татыктуу түрдө кетиптир. Ошондон бери анын артын “казгандар” илинчек таба алышпай бушайманга батыштыбы?
"Азия Ньюс" гезити
