Ректор Айгүл Абдраеваны кандай жаза күтөт?
Буга чейин жазып келгенбиз. И.Арабаев атындагы КМУнун ректору Айгүл Абдраеванын кайдыгерлиги, шалаакылыгы жагынан сындап, анын ишмердигине байланыштуу шек саноолор жаралганы боюнча. Коррупциялык элементтерден коңгуроо кагылган. Жаңылбаптырбыз.
И.Арабаев атындагы КМУда чет өлкөлүк студенттердин билим алуусуна байланыштуу мыйзам бузуулар фактысы ачыкталды. Көмүскө коррупциянын бышып-жетилгени ушулбу? Себеби, чет элдик 59 студент окубай эле сыртта жүрүшкөн, мындайча айтканда, өлкөдө жок. Аларды жаап-жашырышып, окуп жаткандай жымсалдашып, акчасын алып туйтунушканбы? Дал ушул мандемдүү окуя коомчулукта талкуу жаратып, окуу жайдын аброюна сокку катары урулду.
Коррупциялык кылмыш иши боюнча И.Арабаев атындагы КМУнун ректору Айгүл Абдраева, проректор Раушанбек Зайниев суракка чакырылганы кабарланган. Кылмыш иштин алкагында тийешелүү жетекчилер жоопкерчилик тартышабы? Эгерде өнүккөн өлкөлөрдө мындай кыңыр иш ачыкталса, окуу жайдын ректору баш болуп, түздөн-түз башкаруучулар жумуштан алынышып, катаал жазага тартылышмак!
"Азия Ньюс" гезити
