Миллиардер Маргулан Кыргызстан тууралуу оюн айтыптыр
Миллиардердин Кыргызстан тууралуу пикирин журналист Ыдырыс Исаков баракчасына жазып чыкты.
“Чабандыктан миллиардерликке жеткен казак жигит бар. Аты-жөнү Маргулан Сейсембаев. Аны жалаң байлар тууралуу жазган “Форбс” журналы дүйнөлүк деңгээлдеги миллиардерлердин тизмесине кошкон. Ошол Маргулан Кыргызстан тууралуу оюн айтыптыр.
“Кыргызстанга азыр экономикалык реформа жасоонун кереги жок. Күч, көзөмөл жана сот органдарын реформалоо зарыл. Бул үчүн президенттин диктатурасы керек. Бирок ал диктатура эки гана жылга созулушу керек. Ошол эки жыл ичинде президент күч органдарын (бажы, милиция, прокуратура, УКМК, финпол, салык, санэпидемия, эсеп палатасын) реформалап бүтүрүүгө үлгүрүшү керек. Эки жылдык убактылуу диктатура үчүн Конституцияны өзгөртүүнүн кажети жок. Баштапкы эки жыл ичинде элдин колдоосуна, өзүнүн популярдуулугуна гана таянып, каалаган реформаны ишке ашырса болот.
Күч структуралары реформа болгондон кийин экономиканын бетине өзүнөн-өзү кан жүгүрөт. Экономикага күн тийет. Суу жетет. Анан экономика өзүнөн-өзү дүркүрөп өсө берет. Анткени экономика бул – эгин талаасына окшош” дептир. Бул ойго мен толук ынанып отурам”.
«Азия Ньюс» гезити
