Министр Бактыгүл Жээнбаеванын айткандарына каңырык түтөйт
Жергиликтүү маалымат каражаттарынын бирине өлкөбүздүн каржы министри Бактыгүл Жээнбаева узун аңгеме-дүкөн куруп, өлкөбүздүн азыркы каржылык абалын кенен-кесир айтып бериптир.
“Бактыгүл айымдын айткандарын окуп отуруп, каңырыгың түтөйт” деп “Нью ТВ” билдирди. Тимеле айласы алты кеткен аткаминерибизди аяп да, сөгүп да аласың.
Анын айтымында, бүгүнкү оор каржылык абалда сырттан карыз албаска такыр айлабыз жок экен. Ички каржылык булактардын көзүн табуу жөнүндө ныпым сөз кылбаптыр. Жаңы ишканаларды ачып, кошумча жумуш орундарын түзүү тууралуу сөз айтмак түгүл, кыйынчылыкка кептелген ишкерлерди, бизнести кантип колдоо тууралуу алгылыктуу аракеттерди да айта албаптыр.
Ар бир кризис жаңы мүмкүнчүлүктөрдүн эшигин ачары белгилүү эмеспи.
Биздикилер болсо жаңы эшиктерди ачмак түгүл, ачылып турган эшиктерди четинен жаап бүтөт сыягы.
Ээлеген кызмат ордуңарды кор кылбай, башыңарды иштетип, жаныңарды бир аз кыйнап иштебейсиңерби?! Сырттан карыз алып, келген акчаны ал жак, бул жакка бөлүштүрүп отура бергенге анча деле акылдын кереги жок да. Кайран элим, шорубуз калың окшойт го…
“Азия Ньюс” гезити
