Ак кийимчен элестер бийлеп жатат...
Австрия композитору Кристоф Виллибальд Глюктун «Орфей жана Эвридика» операсынан алынган «Эки элес» аттуу композициясы бар. «Орфей жана Эвридика» байыркы грек уламыштарынан алынган чыгарма. Орфей менен Эвридика улуу махабат менен баш кошушат. Бирок бактылуу жубайлардын жашоолору узакка созулбай, Эвридика каза болуп калат.
Эвридиканы уулуу жылан чагып, каза болот. Бул жоготуу түгөйү Орфей үчүн аябай оор болот. Орфейдин жандүнөсү боздогондой шамал озондойт. Күндүр-түндүр кара жаан токтобой булуттар ыйлайт. Орфей соолугандай жаратылыштагы жандуунун баары соолуйт. Чыгарманын акырында жараткандын буйругу менен Орфей «Өлгөндөр хандыгына» аттанат. Ал жерде Эвридикасын табат. Эми алар эч качан айрылгыс болуп, «Өлгөндөр хандыгында» калышат. Алар түбөлүктүү түгөйлөр символундай көрүнөт. К.Глюктун сыздаган музыкасы. Ак кийимчен эки элес бийлеп жатат. Керемет композиция...
