Замир Казакбаев, журналист: “Тик Ток” аркылуу канча адам иш кылып жатышканын билишпейби?”

31-август, 21:08

553 ᠌ ᠌ ᠌ ᠌᠌ ᠌ ᠌᠌

-- “Тик Ток” тиркемесин жабуу боюнча маданият, маалымат, спорт жана жаштар саясаты министрлигинин билдирүүсү көпчүлүк адамдардын, айрыкча чыгармачылыкка ыктагандардын нааразычылыгын жаратууда. Сиз кандай пикирдесиз?

-- Дагы бир кейиткен кызыктай жагдайга дуушар болуп отурабыз. Кол менен санай турган айрым келесоолорго теңелип, маданият министрлиги “Тик Токту” жабат имиш. Ошол тиркеме аркылуу канча адам иш кылып атканын билишпейби? Мен түшүнбөйм, эгер келесоонун катталуучусу болуп, ошонун лентасын карап отурган бирөөлөр болсо, анда ким күнөөлүү? Бир келесоону бир келесоо көрө берсин да. А эмнеге алар үчүн жалпы элди келесоо кылыш керек?

Маселе “Тик Токто” же казинодо эмес! Казиного барып ойноп, утулуп калып, догурунган немелерге дагы түшүнбөйм. Ал уттурайын деп барган жок да? Өтүп бараткан жеринен бирөө казиного жетелеп кирмек беле? Ал ачкөздөнүп, жеңил эле акчалуу болгусу келип барды да, туурабы? “Тик Ток” деген бул болгону тиркеме. Аны колдонуу боюнча эл менен иш жүргүзө турган мекеме катары жоопкерчиликти моюнга алып, коомчулукка карай тыгыз иш алып баруунун ордуна, жаба салган оңой да. Айтор, кызыктай эле түшүнүксүз коом болдук...