Тазабек Икрамов: “Пантеранын” 200гө жакын офицер, жоокерлерин жумушу жок калтырганы жатышат”
--Тазабек мырза, “Пантера” атайын милдет аткаруучу тобунун курамы кыскарып жатканын айттыңыз. Ага эмне себеп болуптур?
-- Бизде Улуттук гвардия болгон. Отуз жыл мурда анын алдында “Пантера“ аттуу атайын милдет аткаруучу топ уюштурулуп, анын курамында 300дөй жоокер, офицерлер кызмат кылчу. Бүгүн ал топту жоюп, Лейлек районундагы Маргун айылында “Мурас” атайын милдет аткаруучу тобу түзүлүптүр. Бирок, ага 100 эле адам кабыл алат экен. Ал эми 200гө жакын офицер, жоокерлер жумушу жок калганы турат. Бүгүн жалпы дүйнө жүзү боюнча абал кооптуу болуп турганда, аскер кызматкерлерин жумушсуз калтыруу туура эмес кадам деп эсептейм.
-- Баткенде атайын кызмат аткаруучу топ түзүлгөнү туура эле да?
-- Албетте, туура. Бирок, Маргунда топ түзүп, “Пантеранын” 100 жоокерин алып, 200ү жумушсуз калып калганы – бул да туура эмес. Баткенде топ түзүлүп, аймак күчтөндүрүлгөнүнө эч кимдин каршылыгы жок. Тескерисинче, биз деле “кээ бир күч түзүмдөрүн бул жакта кармап отуруунун кереги жок, Баткенге которгула” деп сунуштап жатабыз. Бирок, алардын жүзүн которуп, эки жүзүн жумушсуз калтырып коюп атышат. Мен ушул жагына көңүл бурууну сурандым.
"Азия Ньюс" гезити
