Россияда коркунучтуу илдетке чалдыккандардын саны 1,5 миллионго жетти
Россияда ВИЧ-инфекциясын жуктургандардын саны 1,5 миллионго жетти. Бул тууралуу керектөөчүлөрдүн укуктарын жана адамдын бакубаттуулугун коргоо жаатындагы көзөмөл боюнча федералдык кызматына (Роспотребнадзор) караштуу СПИДдин алдын алуу жана эпидемология илимий иликтөө борборунун башчысы Вадим Покровский билдирди. Анын эсебинде 2030-жылы бул сан 2 миллиондон ашат.
Ал эми Россиянын саламаттык сактоо министрлиги Покровскийдин билдирүүсүн четке кагып, инфекцияга чалдыккандардын саны 850 миңдин тегерегинде экенин маалымдады.
Буга чейин Вадим Покровский Мамлекеттик Думада сүйлөп жатып, 2017-2020-жылдар аралыгында ВИЧтен 80 миң россиялыктын өмүрү кыйылганын айткан. Окумуштуунун пикиринде, Россияда ВИЧ боюнча кырдаал болуп көрбөгөндөй начар. 100 миң адамдын жан башына алганда бул сан Евробиримдиктин мамлекеттериндеги көрсөткүчтөн он эсе жогору.
2022-жылдан баштап Россиядагы мигранттар дагы толук медициналык кароодон өтүүгө милдеттендирилген.
