Азат Равшан: “Бизде эркин ойлонгон, позициясы бар адамдар дайыма куугунтукталат”
-- Азат мырза, бир топ жылдан бери силердин үй-бүлөгө саясый куугунтуктар токтобой келет. Мунун түйүнү эмнеде?
-- Акыркы убактарда биздин үй-бүлөбүзгө, жакындарыбызга, биз менен иштешкен адамдарга куугунтук аябай көбөйүп кетти. Мен муну мындай деп түшүнөт элем, эркин ойчул адам – авторитардык система үчүн коркунучтуу сезилет. Анткени бизде эркин ойлонгон, көз карандысыз позициясы болгон адамдарды дайым кысымга алышат.
Мисалы, менин атамдын саясый аракеттери, телеканалдын эркин позициясы азыркы бийликке жакпайт. Буга чейинки бийликке келгендер да чыныгы демократиялык баалуулуктарды, эркин ойлонгон адамдарды куугунтуктап, үй-бүлөсүнө чейин киришип, чектен чыгып басмырлап келишти. Акыркы убактарда жарандык коомго куугунтуктар көп башталды. Адвокаттарга, медиаларга, саясатчыларга, алардын үй-бүлөлөрүнө. Канчалык авторитардык система күчкө кирген сайын, ошончолук эркин ойлонгон адамдарга басым жасала берет. Мындай кысымдар биринчи жолу болуп жаткан жок. Өзүңүздөр билгендей, атам жыйырма жылдай убакыттан бери саясатта болсо, чоң атам да саясатта болуп, Курманбек Бакиевдин убагында куугунтукталган. Ар дайым авторитардык режимдеги президенттер келген сайын куугунтукталып келебиз. Бирок бул биз үчүн кыйынчылык эмес. Эң негизгиси, өзүбүздүн баалуулуктарыбызды сактап, Кыргызстан келечекте өнүккөн мамлекет болсун десек, Конституция берген укуктарыбызды колдонуп, өз пикирибизди эркин айтып турушубуз керек.
Жамиля Нурманбетова
"Азия Ньюс" гезити
