Бийлик кассалык аппарат боюнча шарттарды ишкерлер менен чогуу иштеп чыкмай болду
Министрлер кабинетинин төрагасы Акылбек Жапаров "Дордой" соода-рынок комплексинин ишкерлери менен жолугуп, контролдук-кассалык аппараттар боюнча сүйлөштү.
Ал контролдук-кассалык машиналарды (ККМ) киргизүү боюнча түшүндүрүү иштери начар жүргүзүлгөнүн белгилеген. Жапаров өкмөт жаңы салык киргизбегенин айтып, муну менен катар товар жүгүртүү 8 миллион сомго жетпесе, ишкер салык төлөөдөн бошотулат деген ченемди эске салган.
“Биз базардагы ар бир соодагер менен сүйлөшүүгө жана жөнөкөй мисалдардын негизинде түшүндүрүүгө даярбыз. Эсеп бардык жерде болушу керек. Бул контрабандадан жана эсепке алынбаган товарларды киргизүүдөн арылууга жардам берет. Фискалдаштыруу менен санариптештирүүнү өлкө ичиндеги, анын аймагынан тышкаркы товарларды эсепке алуу жана анын кыймылын көзөмөлдөө үчүн киргизип жатабыз. Бул биздин жеке каалообуз эмес, бул рыноктун жана замандын талабы. Диалогго даярбыз. Силерге да, биз үчүн да ыңгайлуу алгоритмге келели” деди Акылбек Жапаров.
