Жолдош Турдубаев, адабиятчы: “Бизде кадрларды даярдап өстүрүү системасы жок”
-- Өлкөдөгү өнүгүүнүн, реформалардын жылбай жатканы кадр саясатынын начардыгынанбы? Кызматтык милдетин так аткарбаган, коррупцияга айыпталган жетекчилерден качан тазаланабыз?
-- Бизде азыр кадрларды даярдап өстүрүү, татыктууларды тандап алуу системасы жок. Стратегиялык мааниси бар кызматтарга адамдар иштин көзүн билгендиги, орчундуу маселелерди чечүүгө жөндөмдүү экендиги үчүн эмес, көбүнчө чоңдорду колдоп сүйлөгөнү, мактап жүргөнү үчүн тандалып жаткандай. Кесипкөй кызматкерлер чынчылдыгы үчүн кетирилип, ордуна кошомат айткандан башка эчтекеге жарабаган "өз кишилер" дайындалып калган учурлар көп окшойт. Андайлар бир кызматта ишти жүргүзө албаса, олуттуу каталарга, эреже бузууларга жол берсе, жоопкерчиликке тартылбай, дагы башка орундарга которулуп кеткен учурлар да айтылып, жазылып жүрөт.
Бул жагдай сот бийлиги түп-тамырынан реформаланып, судьялар Конституциядан, мыйзамдардан башка эч кимге баш ийбеген шартта гана оңолушу мүмкүн.
Сингапурда башкаруу катаал болгонун сөз кылгандар көп, бирок кадр саясаты меритократияга негизделгенин эске алышпайт. Меритократия – кызматкерлердин ким экенине карабай, өзүнүн тармагында мыкты тажрыйбасы, уюштуруучулук жөндөмү бар кесипкөйлөрдү тандап алып көтөргөн система.
Өзүнүн баркын билген кадрлар көп ийиле бербейт, жетекчилер менен ишке байланыштуу талашуудан тартынбайт, көпчүлүк «укмуш, эң сонун» деп мактап жаткан чечимдин "бирок" жагын ачык айтат.
"Азия Ньюс" гезити
