“Интеллигенциянын басымдуу бөлүгү коррупцияга аралашып, улуулугун жоготуп алышкан”
-- Бизде саясый элита, интеллигенция, аксакалдар деген барбы? Эмнеге бийликке сунуштарын, акыл-насааттарын айтышпайт?
Мавлян Аскарбеков, оппозиционер:
-- “Калыс сөзүн айтпаса, карылардан не пайда, акыл-насаат айтпаса, аксакалдан не пайда?” деп кыргызда кесе айтылган. Академик, профессор, айтор, пайгамбар жашынан өтүп калса да бийликке жагалданып, кошомат артып жүргөн карылар көп. Бул – трагедия. Себеби бар. “Бала тентек, аял ойноок болсо оңолот. Аксакал жасакерлик кылып, калыс сөзүн айтпаса журт жоголот” дейт. Азыр өзүн саясый элита атаган улуу муундагы саясатчыларды Махатма Ганди так аныктаган: “Колонизаторлор тарбиялаган элита – өз элинин башкы душманы” деп. Булар эл үчүн эмес системага кызмат кылган, өлкө эмес өз кызыкчылыгын көздөгөндөр. Эгемен эл болобуз десек, элита да элден чыгышы керек. Эртеңкиге жаңы саясый элитаны калыптандыруу – бүгүнкү бийликтин негизи максаты болушу зарыл. Билимдүү, тажрыйбалуу, принципиалдуу, туура баалуулуктарды карманган, бир топ тилде эркин сүйлөгөн, элдин, мекендин баркын чындап туйган, ички-тышкы күч, душмандарга туруштук берчү инсандарды өстүрүү абзел. Ошондо гана кыргыз эли эл катары сакталып, мамлекет күчтөнөт.
Төрөбай Колубаев, серепчи:
-- Азыр интеллигенция, аксакалдар дегенде даражалуу кызматтарда иштеген Медеткан Шеримкулов көз алдыбызга келет. Баарыбызга, бийликтегилерге ошол кеңеш берчүдөй, жол көрсөтчүдөй сезилет. Бирок, ал да учурунда калпыстыкка жол берген. Иранда элчи болуп жүргөндө арзыбаган ишке аралашканы үчүн кызматтан кеткен. Азыр Эл Баатыры болуп жүрөт. Ал эми учурунда мамлекетти башкарган экс-президенттер чет өлкөлөрдө баш калкалап жүрүшөт. Анан кимиси менен мактанабыз? Аксакалдарыбыз, интеллигенциянын басымдуу бөлүгү коррупцияга аралашып, улуулугун жоготуп алышкан. Ошон үчүн алар бийликке кеңеш бергенге батынышпайт, сындай да алышпайт. Себеби, аксакалдардын дээрлик көбү өз кызыкчылыгы үчүн бийликтен кызмат сурашып, уул-кыздарын, неберелерин иш менен камсыздашып, бизнестерин коргошуп, ооздорун жаап отурушат. Ооз ачкандын баарын ордуна коюп жатканда эч кимиси сүйлөй алышпайт, кеңеш берүүнү айтпай эле коёлу.
"Азия Ньюс" гезити
