Билл Гейтс пандемия качан аяктарын айтты
Дүйнөдөгү эң бай адамдардын бири Билл Гейтс 2022-жылдын аягына чейин жашоо өз нугуна түшөрүн билдирди.
“Sky News” басылмасына берген маегинде миллиардер жашоонун качан кадимки калыбына келери тууралуу суроого жооп берди. Ал вакциналар тездик менен жайылтылып жатканын баса белгилеп, 2022-жылдын аягына чейин жашоо өз нугуна түшөрүн болжолдоду.
Учурда препараттар өнүккөн өлкөлөрдүн монополиясында экендигин, бул жактарда эмдөө керектүү деңгээлге жетерин, ушул этаптан кийин дүйнө жүзү менен бөлүшөрүн баса белгилеген Гейтс бул кадам пандемиянын жүрүшүнө маанилүү таасирин тийгизерин кошумчалады.
Билл Гейтс Сovid-19га каршы долбоорлорго каржылык колдоо көрсөтүп, миллиондогон долларларды жумшады. Жубайы жетектеген “Гейтс” фонду окумуштуулар Угур Шахин жана Өзлем Түречи ээлик кылган “BioNTech” компаниясына 55 миллион доллар бөлдү. Булардан башка да вакциналарга каражат берди.
2019-жылдын акыркы айында пайда болгон коронавирус биринчи катталган күндөн баштап дүйнө жүзү боюнча 150 миллиондон ашуун адамга жугуп, 3 миллиондон ашуун адамдын өмүрүн алды.
