“Сегиз жылдык өмүрүбүздү өзүнөн улуу аялга алмаштырды...”
Күйөөм экөөбүздүн түтүн булатканыбызга сегиз жылдын жүзү болду. Ушул жылдарда биз төрт балалуу болдук: үч уул, бир кызыбыз бар. Балдар чоңойгон сайын тапканыбыз тамагыбыздан ашпай калды. Күйөөмдүн досу “Москванын бир жеринде иштеп келдим” деп келип үй алган. Күйөөм да “үй албасак да үйдү ремонттоп, короо жайды тоскондой акча таап келейин” деп кеткен. Алты айдай акча салып, биз менен тынбай сүйлөшүп жаткан. Жаңы жылдан кийин ал биз менен анда-санда сүйлөшүп калды. Кийин таптакыр байланышка чыкпай, “жумушум болбой жатат” деп бир жолу гана СМС жазып койду. Көрсө, ал жактан кайненем курактуу бир аял менен жашап алыптыр. Анысын кайненеме айтсам, “эркек жүрөт да, эмне болуптур?” деп койду. Чыдабай кетип, “балаңыздын аялы сиз менен курдаш экен” десем, мени менен уруша кетти. Ошол бойдон кайын журтум да күйөөмө карыган аялды мен таап бергенсип катышпай тултуюп жүрүшөт.