Ал мени унута албай кыйналып жатканын, бирок унуткусу келерин айтты
Бир жигит менен онлайн таанышып, сүйлөшүп, бири-бирибизди жактырып калдык. Биз бир гана видео аркылуу көрүшкөнбүз. Бир убактарда узакка тыныгуу болуп кетти. Ага карата сезимдерим өчө түшкөнсүдү. Ал кайра байланышып, бир ай бою мамилебизди оңдоого аракет кылды. Мени унута албай кыйналып жатканын, бирок унуткусу келерин айтты.
Бир убакта баардык социалдык тармактардан жоголуп кетти. Анын алдында бирөө менен таанышканын жана мени ошол кыз менен унуткусу келерин айткан. Кубанычтамын. Балким чыныгы сүйүүсүн тапкандыр, баары түшүнүктүү, бирок эмнеге ал социалдык тармактардан таптакыр жоголду? Такыр эле бул дүйнөдөн кетип калгандай сезилип жатат...
Мен башка аккаунттар аркылуу текшердим, бирок анын номери жок. Азыр мени түшүнүксүз бир коркуу сезими каптады: эмнеге ушинтип жоголуп кетти жана бул канчага созулат? Мен ага кыз кылыгын көрсөткөнүм менен чындап жактырып калганымды түшүнүп, аман болушун тиленип отурам...
Алия
"Азия Ньюс" гезити
