Төлөнбек Абдыров: “Келерки жыл башында экономикалык оорчулук күтүлөт”
-- Доллардын көтөрүлгөнү кымбатчылыктын белгисиби?
-- Биз жалаң импорт менен жашап калганбыз. Биздин өзүбүздүн өндүргөн продукциянын көлөмү абдан аз. Эгерде өзүбүздө продукция өндүрүлсө, анда биз аны чет жакка сатканда, кеп башкада болмок. Биз бул жакта өндүрбөгөндөн кийин, чет жактан алып келип жаткан соң, баалар долларга жараша болот. Доллар көтөрүлсө, баа деле көтөрүлө берет. Бул экономиканын мыйзамдары.
-- Эксперттер “экспортто жылыш бар” деп кубандырып жатат го?..
-- Анча-мынча болсо деле жылыш боло берет. Эч ким эч нерсе кылбаса деле жылыш болот. Анткени, Кумтөрдөн аз болсо да кен байлыктарды иштетип, алтындарды таап жатканы – ал деле ошол экспортко кетет. Кичине болсо да өсүш бар. Дайыма эле ушундай көрүнүш. Экономикада эч нерсе кылбаса деле 3-4% өсүш бар болуп саналат. Инерция менен кыймыл болгондуктан, жок болбой азыраак өсүш жүрө берет. Бирок, “бул өкмөт келе калып экпортту өстүрүп, өнүгө баштадык” дегенден алысмын. Биз, эксперттер жыл башында эле белгилегенбиз, өкмөт да буга макул болгон. Салыктардан, дагы башка социалдык багыттардагы булактардан акча түшпөй, артка чегиндик. Алдыдагы жарым жылдыкта, келерки жыл башында экономикалык оорчулук күтүлүп турат.
Жамиля Нурманбетова
"Азия Ньюс" гезити
