Садыр Жапаров ууру-кески саясый элитаны шайлоодо пайдаланып туруп жайлайбы?
Учурда «чимкирик» аталган парламенттин 90 пайызы Садыр Жапаровго кошомат кылышып, президенттик шайлоодо иштеп бергени калышты. Булар «ууру-кески», саткынчылар экени талашсыз чындык. Андан сырткары коррупцияга малынган экс-чиновниктер, шектүү элитанын көпчүлүгү жагынуу үчүн аламанда сүрөөнгө алышканы турушат. Сапатсыз, ыраатсыз чиновниктерди айтпай эле коёлу... Ушул жагдайдан алганда, бийликтин коррупцияга каршы күрөшүүсү басаңдап калгандай. Биздин баамыбызда, Садыр Жапаровдун рейтинги Кудайга шүгүр, мындай шартта кошоматчылардын добуш алуусуна кызыкпай эле койсо болмок. Тескери реакция берери шексиз. Аларды чекесинен камакка алуу менен «кустура» баштаганда эл да туура түшүнмөк. Сыягы, Садыр Жапаров аларды аламанда иштетип алгандан кийин жазалаганы калды окшойт. Эки жолу түрмөгө отуруп чыгып, көп нерсени ажырата билип калган адам баары бир ууру-кескилерди соо койбосо керек. Шайлоодо пайдалангандан кийин жайлайбы?
"Азия Ньюс" гезити
