Мырзакматов бийликке туталанып, оппозициячыл талапкерди колдогону жатыптыр
Жаңы бийлик келгени ыңгайдан пайдаланып, Мелис Мырзакматов соттуулугун алдырып, акталууга жетише койгон. Анан “устукан” тийбей калганда таарынып, Түркияга кетип калганы маалым. Учурда бирде Москвага, кайра Стамбулга учуп, “катта” саякаттоо менен мигранттарга жолугушуп, Садыр Жапаровго каршы иштөө таризинде баш оорутуп жүргөнү кандай? Туталанып. Президенттик шайлоого карай Мырзакматов оппозициялык маанайдагы талапкерди колдоого ала турганы, азырынча консультацияларды алып атканы тастыкталууда. Ошого катар ал саясатчылардын ынтымагын түзүүгө, бир муштумдай түйүлүү менен бийликке карай каршылык акциясын уюштурууга белсенеби? Коомчулуктан рейтинг алууга үлгүрсө, андан соң парламенттик шайлоого аттанууга ниети бар экен. Сыягы, Түркияга чыгарып кеткен бизнесин Мелис Мырзакматов гүлдөтүү менен оппозицияга өтүп, акчанын күчүнө салса, натыйжада, Акүйгө акаарат келтирген топтун көч башында болчудай...
"Азия Ньюс" гезити
