Аша чапкан пиарщиктер президенттин аброюна көлөкө түшүрө башташты
Бийликти жактаган блогер, фейктерге карата акыл-эстүүлөр аркылуу кеңеш айттырып коюшпайбы? А болбосо соцтармактардан Садыр Жапаровду мактоого алып жатышып, ошого катар оозго алгыс сөздөр менен оппозициялык маанайдагы саясатчыларды, эркин журналисттерди шыбап өтүшөт. Ушундай ыплас пиар кампанияны күчөтүп атышса, коомчулук ичиркенүүдө. Алардын аттарын жазууга да дит барбайт. Негизи демократиялуу өлкө болгон соң, сынчыл көз караштар, конструктивдүү ой-пикирлер айтылып турушу кажет. Ыксыз пиарщиктер бийликке карата симпатия жаратуунун ордуна буза башташканын билишпейби? Мындай илең-салаң, “сен жинди” деген маалыматтык күрөш менен алыска баруу мүмкүн эмес. Андыктан, президент айланасын саресепке салып, жаңыланууга барышы зарыл. Эрегишүү, кек сактоо, чукулашмай, ач айкырык, куу сүрөөнгө алуунун мааниси канчалык? Өзгөрүүгө убакыт келди да.
"Азия Ньюс" гезити
