Конституциялык палата Атамбаевдин кайрылуусун канааттандырган жок
Үстүбүздөгү жылдын 27-июнунда Жогорку Кеңеш «Кыргыз Республикасынын президентинин ишмердигинин кепилдиги» жөнүндө мыйзамга өзгөртүү киргизип, Алмазбек Атамбаевди экс-президент макамынан ажыраткан эле.
Парламенттин мындай чечимине макул болбогон мурдагы президент Алмазбек Атамбаев Конституциялык палатага кайрылган.
Конституциялык палата бул маселени карамайынча өзүн тергөөгө күбө катары чакырууну мыйзамсыз деп эсептеп, А.Атамбаев суракка баруудан баш тарткан болчу.
Жогорку соттун Конституциялык палатасы экс-президент Алмазбек Атамбаевдин өтүнүчүн четке кагып, 2019-жылдагы «Президенттин ишмердигинин кепилдиктери жөнүндө» мыйзамдын нормаларын Баш мыйзамга ылайык деп тапты. Бирок Конституциялык палата «учурдагы президент экс-президенттен кепилдикти алат» деген эреже Баш мыйзамга дал келбей турганын билдирди.
Мурдагы президент Алмазбек Атамбаев экс-президент деген макамдан ажыратылгандан кийин тергөөгө сурак бериш үчүн үч жолу чакырылса да келбей койгон. Акыры бул окуя 7-8-августта Кой-Таш айылындагы үйүнөн тергөөгө күч менен алып келүү аракети башаламандык менен коштолуп, УКМКнын «Альфа» атайын тобунун бир кызматкери курман болуп, жүздөн ашык адам жабыркаган.
