Ың-жыңсыз кеткен экс-министр Бекмурзаев ак кийип, молдо түспөлүндө чыга келди
Энергетика министри кезинде мүдүрүлгөн. Башкы прокуратура тарабынан коррупцияга айыпталып, кызматынан кеткен эле. Мамлекетке келтирген чыгашаларынын канчасын кайрыганы, же “кусканы” белгисиз. Козголгон кылмыш иштери жабылдыбы, же дагы эле сүйрөлүп жүрөбү, айтор, бул жагынан маалымат жок. Коомчулук астынан ың-жыңсыз кеткен экс-министр кечээ молдо түспөлүн жамынып, ак кийип чыкты. Ал Жусуп Баласагын атындагы дин агартуу ордосуна келип, руханий азык алып, бул жердеги өспүрүмдөргө жардам бере турганын баса белгиледи. Сөзүнүн аягында Доскул Бекмурзаев жашып, ички дүйнөсүнүн тазаланып атканынан ыйлап да жиберди. Азамат экен! Ошондо өткөн чактагы күнөөлөрү, жеген-ичкени кечирилеби? Эми коррупцияга айыпталган чиновниктер түрмөгө отурбай эле диний уюмдарга демөөрчү болушуп, молдолукка баш урушабы? Кыргызстан кызык эле өлкө да...
"Азия Ньюс" гезити
