Мээрбек Мискенбаев, экс-депутат: “Соке командасы менен Кой-Таш окуясы боюнча жооп берсин!”
-- Мээрбек, Кой-Таш окуясы эмнеге тынчып калды?
-- Кой-Таш окуясына 4 жыл болду. Бул убакыттан бери башы бар, аягы жок болуп эле келатабыз. Улуу Ата мекендик согуш 1941-жылы башталып, 1945-жылы бүткөн. А биздики андан да өтүп кетти окшойт. Бул боюнча КР президенти Садыр Жапаровдун наамына кат жазганбыз. Кудай буюрса, оң жагына чечилип каларынан үмүт кылып, күтүп атабыз. Анткени, Кой-Таш окуясында болуп аткан соттук иштер оюн болуп, президентке баардыгы толук жетпей атса керек. Чын-бышыгы жетип калса, президент өзү чекит коёт деген ишеним бар.
-- Чекит кантип коюлат?
-- Баардыгы келип Сооронбай Жээнбековго, Кашкар Жунушалиевге, Орозбек Опумбаевге, Алмамбет Салиевге, Өткүрбек Жамшитовго такалууда. Ушул адамдар келип суралып, кечирилгис күнөөлөрү сот аркылуу далилденет (!) деп турабыз.
-- ИИМ жана УКМК кызматкерлери толугу менен суралып бүттүбү?
-- Алардын баары келип, сотто биз тарапка “эч дооматыбыз жок” деп көрсөтмө беришти. Дагы бир жолу айтайын, баардыгы келип Сооронбай Жээнбековдун командасына такалды. Кой-Таш окуясына байланыштуу сот ишине адилеттүү чечим чыгат деген терең ишенимдебиз! Акыры Соке жанжөөкөрлөрү менен жооп берет...
Сурат Жылкычиев
"Азия Ньюс" гезити
