Жагымсыз сөз ээрчиткен Эмилбек Абдыкадыровдун жүрүшү
Соцтармактарда “эски жүздөргө” карата жагымсыз ой-пикирлер жазылып жатканын баарыбыз эле көрүүдөбүз. “Эл оозунда элек жок” дегендей. Мисалы, 67 жаштагы Эмилбек Абдыкадыров Октябрь районунан парламенттик шайлоого катышарын билдирип, БШКга катталды. Интернет колдонуучулар эмне деген гана терс сөздөрдү жазышууда? Кайталап отуруу кажетсиз. Кыскасы, ачуу сындар... Айтмакчы, Бишкек шаарынын мэри кезинде Эмилбек Абдыкадыровго сын-пикирлер көп айтылып, жазылып, ЖМКнын бетинен түшчү эмес. Акыры президенттин буйругу менен иштен алынган. Ошол бойдон дайынсыз эле. Анан минтип саясый акциялар башталган кезде пайда болду. Эске салсак, ал 2005-жылы да Октябрь районунан Жогорку Кеңешке талапкерлигин коюп, өтпөй калганы эсибизде. Кийин Таластан да чыгып, мандат буюрган эмес. Натыйжада, бул саам да акчасын чачуу менен элдин колдоосуна арзыбай калабы? Көрө жаталы.
"Азия Ньюс" гезити
