Шайлоо күздө тынч өтөбү?
Конституциялык мыйзамга президент кол койду. Анда бир катар жогорку кызматтарга жана парламентке соттуулугу жоюлган талапкерлер атсалыша алышпайт. Сентябрдын башында Жогорку Кеңештин депутаттары өздөрүн таратуу менен кетишери айтылууда. Шайлоо 23-ноябрга коюлушу ыктымал. Кыргызстан боюнча 30 округдун ар биринен эки эркек, бир аял шайланып келмекчи. Миң үгүтчүгө чейин жалдоого мыйзам жол берет. Ошондо бул саам кайрадан эле акчалуулардын күрөшү болору калетсиз. Билимдүү, тажрыйбалуу кадрлар четте калып, баягы эле бай-манаптар, соодагерлер келбесине ким кепилдик берет? Адатта округдардан аттанган талапкерлер арасында чыр-чатактар көп катталары, буга чейин кыйла саясый тирешүүлөр орун алганы эсибизде. Башкасын айтпасак да, 2005-жылы парламенттик шайлоодон соң эл козголуп, толкуп отуруп, аягы 24-марттагы төңкөрүшкө жеткени белгилүү. Албетте, бул саам тынч өтүшүнө тилектешпиз!
"Азия Ньюс" гезити
