Мындан ары тополоңду Максат ажынын сүрөөсү менен токтотобуз!
Коомчулук бир нерсени анчейин аңдаган жок. Эмесе баам салып көрөлү. 9-майда Ноокаттагы күрөштө жапырт мушташ чыгып кетет. Бул боюнча Максат ажы Токтомушев элге кайрылып, окуяны баяндап берди. Кармашта жыгылган жигит ызаланып, жеңишке жеткен балбанды күтүүсүздөн көтөрүп чаап жиберет. Натыйжада, күйөрмандардын кызуу кандуулугунан жапырт мушташ орун алат. “Токтогула!” деп Максат ажы башында кыйкырып, бирок угушпаганынан сүрөө окуп, жин-шайтандарды кубалап, ачууну басууга далалат жасаптыр. Бул боюнча ал атайын видео кайрылуусунда айтып берди. Ошондо милиция, арачалаган элдин да таасири жетпей, молдокебиздин кырааты менен окулган сөрөөсү тополоңду токтотуптур. Эки жаат болуп былчылдаша мушташкандар тып басылып, тынчып калганына баа бергиле. Кызык жыйынтыкка келип атабыз. Эгерде мындан ары тоз-тополоң чыкса, Максат ажынын сүрөөсүн пайдалансаңар болот экен. Баракелде!
"Азия Ньюс" гезити
