Билим берүү жана илим министри Болотбек Купешов иштей албай атат
Ушундай. Билим берүү жана илим министри Болотбек Купешовдун жарытылуу ишин байкай элекпиз. Былтыртан берки пандемияга байланыштуу бул тармак ансыз да кризиске кабылып калган чакта, акыбал өтө оор экенин айтпасак да түшүнүктүү. Мындай шартта министр көрүнүктүү кандай аракетте, демилгеси барбы? Өздүк булагыбыз билдиргендей, Болотбек Купешов иштеп аткандай түр көрсөтүп, жөн эле убакытты текке кетирип атканын, натыйжалуу реформа баштаганга шаасы жетпегенин билдирүүдө. “Эки чылбыр бир тизгинди” алганда эле атка кандай отурганы байкалат эмеспи. “Каарманыбыз” ээрге кыйшык конуп, буга чейин талкаланып келген билим берүү системасын ого бетер жерге тебелеп, басып кете турган караанга айланабы? Айтмакчы, илгери мектептин директору, аким, губернатордун орун басары кызматтарын аркалаган чиновник көп жылдар бою жумушсуз жүрүп, көз карашы, жаратмандык дарамети солгундап калганы, эч кандай маселени чече албасы алдыртан бааланууда. “Аңгектен качсак дөңгөккө” дегендей, мурдагы министрди сындап атып, эми андан төмөн деңгээлдеги көрүнүшкө кабылганыбыз – жалпы элибиздин шорубу?
"Азия Ньюс" гезити