Урматбек Самаев саясатта да чемпиондугун көрсөтүүдө
Жалал-Абад облусунун губернаторунун орун басары Урматбек Самаев чынында эле кыйын жигит экен. 2023-жылы ак жеринен караланып, кармоого алынганы эсибизде. Учкай талдоого алалы. Ал Токмок шаарынын мэри кезинде коррупцияга шектелип, оор кылмышкердей спецназдар аркылуу камакка алынган. Анан убакыттын өтүшү менен Жогорку соттон акталып, таза кадр экени далилденди. Алтургай Жалал-Абад губернаторлугунун орун басарлыгына дайындалып, учурда жемиштүү иштеп атат. Башынан жаманчылык өтсө да чөкпөй, бир калыптагы мүнөзүнөн жазбады. Натыйжада, Урматбек спортто эле эмес, саясатта да чемпиондугун көрсөтүүдө. Сары Өзөндүн белдүү уулдары улам камалышып, майдандан четтеп калышты го? Ал эми биздин “Чемпион” катаал оош-кыйыштарды жеңип, эл керегине жароонун багытында баратат. Туура жолдон тайбай, сабырдуулук, алдыны көрө билүү менен кадамын жасай берсе, Урматбек Самаев аша турган ашуулар али алдыда.
"Азия Ньюс" гезити
