Манас Арабаевдин тапанчасы уурдалып, чуу чыканы айтылууда
Алмазбек Атамбаевдин дооруна кайталы. Агезде президенттик аппараттын соттук реформа жана мыйзамдуулук бөлүмүнүн башчысы Манас Арабаев оппозициячыл саясатчыларга, журналисттерге ыдык көрсөтүп, кылмыш иштерин козготуу, каматуу жагынан куратор болгону ЖМКларга чыгып келген. Сооронбай Жээнбеков ажолук такка отургандан кийин бул эргулду убактылуу каматып, анча-мынча жазасын берген эле. Аныгында, ал жеңил кутулуп кеткен.
Кызыгы, күч органдарындагы өздүк булагыбыз билдиргенине келсек, жакында Манас Арабаевдин Кара-Жыгачтагы үйүнө ууру кирип, тапанчасын жана 17 огун тоноп кеткен. Бул курал Садыр Жапаровду убагында каматканы үчүн сый акы катары тартууланганы айтылууда. Учурда милиция кылмышка шектүүнү таппай жатканын уктук. Эми кандай? Акыйкатсыз иретинде адамдардын көз жашына забын болуп, ошентип жеткен куралың өзүңө буюрбай, уурунун колуна кеткени ушулбу? Кокус андан бейкүнөө атуулдар жабыркасачы? Баш чайкайсың да...
"Азия Ньюс" гезити
