Кыргызстанда эң жогорку пенсияны кимдер алышат?
Кыргызстанда эң жогорку пенсия 104 миң сомду түзө турганын Социалдык фонддун башчысы Медер Ирсалиев Жогорку Кеңештин жалпы жыйынында билдирди.
Кыргызстанда пенсиянын эң төмөнкү көлөмү айтылып келерин, бирок эмнегедир эң жогорку пенсия айтылбай турганына депутаттар кызыкты.
Ирсалиев эң жогорку пенсияны ким аларын айтууга укугу жок экенин билдирип, болгону анын көлөмүн гана айта аларын кошумчалады.
Учурда 2000дей персоналдык пенсионер бар, алар орто эсеп менен 15-16 миң сомдун тегерегинде акча алат. Мындай пенсионерлердин саны жылдан-жылга кыскарып келе жатат. Себеби Кыргызстанда персоналдык пенсияга чыгуу тартиби жоюлган.
Социалдык фонддун буга чейин берген маалыматы боюнча, Кыргызстанда 1200 сом пенсия алгандар дагы бар.
Кыргызстандагы эң жогорку пенсияны кимдер ала тургандыгын Социалдык фонддун башчысы Медер Ирсалиев ачык айткан жок.
104 миң сом пенсия алган адамдын ким экени табышмак бойдон калды.
