Патрулдук милициянын айынан эки бала жан берсе, эч ким жооп бербейби?
Өздүк булактарыбыздын билдиргенине караганда, жаңырган жылдын башында кейиштүү окуя орун алган. Бишкек шаары, 2-январь, түнкү саат 03.00 чамасында патрулдук милиция “Хонда торнео” маркасындагы автоунааны кубалып келип, “Дордой Плазага” кабыштырып салып, натыйжада, гүлгүндөй болгон эки жаш баланын каза болгону кабарланды. Бул маалыматты Бишкек ШИИБнин басма сөз жетекчиси Улан Жумаков эмнеге жашырып, коомчулукка жарыялаган жок? Патрулдук милициянын кызматкерлери Ленин РИИБсине караштуу экени айтылууда. Жаш балдардын өлүмүнө себепкер болушуп, жоопкерчиликтен кутулуп кетиштиби? Ал эми Бишкек шаардык патрулдук милициянын жетекчиси Алмаз Исаков кыңыр ишти жаап-жашырып, билмексен адатына салганыбы? Суроолор көп. Сыягы, суудан кургак чыга беришсе, милицияга ишеним кайдан жаралмак эле?..
"Азия Ньюс" гезити