Нур-Султанда суу жок, жарык өчүп, эл нааразы
Кечээ таңкы саат 5:40тар чамасында Казакстандын Нур-Султан шаарында суу берүү түтүгүндө авария болгон. Тийиштүү кызматтар кечки саат 20:00дө калыбына келтиребиз дегени менен белгиленген убакытта иштер аяктабай калган.
Таңкы саат 5:40тар чамасында суу берүүчү түтүк жарылып, 20дан ашык көп кабаттуу үй суусуз калган. Суу менен камсыздаган "Астана Су Арнасы" ишканасы тургундарга водовоз менен суу жеткиргенин маалымдаган.
Шаар тургундары тийиштүү ишкана эч кандай суу алып келбей жатканын социалдык тармакка жазып, нааразычылыгын билдиришүүдө.
Эске салсак, 10-ноябрда да түнкү саат экиде "Левобережная" көмөк чордонунда кабель күйүп кеткен. Анын кесепетинен жети турак жай комплекси менен 25 административдик имарат жарыксыз калып, тойлор өтүп жаткан кафе-ресторандар да токтогон.
Нур-Султан шаарынын эли улам бир авария алардын жашоосуна, ишине тоскоолдук болуп, жатканын айтып нааразы болушууда.
