КР гимнинин автору Шабданбек Кулуевдин жаркын элесине
Кыргыз Республикасынын гимнинин автору, акын, жазуучу Шабданбек Кулуев 78 жашында дүйнө салды. Кечээ 25-ноябрь күнү мамлекеттик “Ала-Арча” көрүстөнүнө сөөгү коюлду.
Шабданбек Кулуев 1942-жылы Жумгал районунун Чаек айылында 1-январда туулган. 1966-жылы Кыргыз мамлекеттик университетинин механика-математика факультетин аяктаган.
Эмгек жолун 1963-жылы Суусамыр өрөөнүндөгү 8-март, Каракол башталгыч мектептеринде мугалим болуп иштөөдөн баштаган. 1969-1990-жылдары Жумгал районунун Жумгал, М.В.Фрунзе атындагы орто мектептеринде тарбиялык иштер боюнча директордун орун басары, директор; 1990-2006-жылдары Жайыл районунун Түркмөн атындагы орто мектепте математика мугалими, кийин республикалык “Кыргыз туусу” гезитинин штаттан тышкаркы кабарчысы болуп иштеген.
Шабданбек Кулуев кыргыз элине акын катары да кеңири таанымал. “Куланчы мерген”, “Алас-алас”, “Кийик-сай”, “Кылымдар жаңырыгы”, “Сезим кайрыктары” ыр жыйнактары, “Мидин минткен экен” сатиралык аңгемелери, “Эл-жер баяны”, “Өмүр издери” публицистикалык жыйнактары жарык көрүп, окурмандардын жүрөгүнөн түнөк тапкан.
Күжүрмөн эмгектери жана билим берүү тармагына кошкон салымы мамлекет тарабынан жогору бааланып, 1987-жылы “Эмгек ардагери” медалы, 1993-жылы “КР эл агартуусунун отличниги” төш белгиси, 1994-жылы “КР маданиятына эмгек сиңирген ишмер” ардактуу наамы, 2011-жылы “КР эл мугалими” ардактуу наамы ыйгарылган.
Шабданбек Кулуевдин адамдык парасаты жана жаркын элеси жүрөгүбүздүн түпкүрүндө сакталат.
Маркумдун үй-бүлөсүнө жана туугандарына терең кайгыруу менен көңүл айтып, аза кайгысын тең бөлүшөбүз.
“Азия Ньюс” гезитинин жамааты
