Иммунолог күзүндө эң керектүү витаминдерди атады
Бета-каротин организмди сезондук оорулардан сактоодо эң маанилүү ролду ойнойт. Андыктан күзүндө, оорулар күчөгөн маалда курамында бета-каротин бар азыктарды колдонуу керек. Бул туралуу Россиянын RT-каналында иммунолог Марина Аплетаева айтты.
«Күз мезгилинде кызгылт-сары, кызыл, сары түстөгү азыктарды колдонушуңуз керек. Сары-саргыч жашылчалар, жемиштерден шабдалы, сары өрүк, ашкабак, сабиз, коон. Бул азыктар А витамининин башталышы болгон бета-каротинге бай» деди ал.
Аплетаева түшүндүргөндөй, А – жогорку дем алуу жолдорунун былжырлуу челин вирустардын жана бактериялардын киришинен коргой турган негизги витамин. Бирок көп колдонулганда, ал уулуу болушу мүмкүн. Иммунолог бета-каротинди боордо сактоого, керек болсо А витаминине айландырууга боло тургандыгын белгиледи.
Мындан тышкары, анын айтымында, күз мезгилиндеги организм үчүн дагы бир маанилүү элемент – бул С витамини. Анын жардамы менен клеткалык иммунитет жакшырып, дене клеткаларынын өздөрүн коргоо функциясы жогорулайт.
