Аскар СЫДЫКОВ, ишкерлердин эл аралык кеңешинин жетекчиси: «Кээ бир банктар санариптеш-тирүүдө аксап жатышат»

– Банк чөйрөсүн санариптештирүү – жеткиликтүү финансылык кызмат көрсөтүүлөр кандай жүзөгө ашып жатат деген пикирдесиң?
– Ал маселеге өзгөчө көз салсак, массалык маалымат каражаттарында айтылып, жолугушууларда болуп жаткан пикирлерге таянсак, санариптештирүү жүрүп жатат, бирок мындан дагы тездетиш керек. Мисалы, «түндүк мамлекеттер аралык системасы» эбак эле иштеш керек эле.   

Бир мамлекеттик органдан маалымат алып, башка мамлекеттик органдарга тапшыруу – бул өнүккөн өлкөлөрдө жок. Мамлекеттик органдар өзүнчө маалымат алмашышы керек. Бул жакшы нерсе. Экинчиден, банктар санариптештирүүнү колдон келишинче киргизели деп жатат. Бирок Улуттук банктын жогорку деңгээлдеги талаптары катуу. Ошол талаптардан улам кээ бир банктар кызматтарын киргизе албай жатат. Мисалы, ошол эле интернет аркылуу идентификациялоону айтсак болот. Тоолуу аймактарда жашаган элге банктын кеңсесине барбай эле интернет аркылуу идентификациялоо шарты болмок. Андан тышкары, электрондук өкмөт да толук кандуу ишке кирсе жакшы болмок. Анткени жарандарды, бизнесмендерди мамлекеттик кызматкерлер менен бетме-бет карым-катнаш түздүргөндөн  көрө, интернет аркылуу карым-катнашка өтмөк. Коррупцияга азыраак мүмкүнчүлүк болмок.