Оппозициячыл жарандардын арасында өтө акылдуу адистерди байкап келем
Өткөндө бийликти басып алуу максатында массалык башаламандыктарды жана баш ийбестик акцияларын даярдоого катышкан адамдардын тобу кармалган. Алардын арасында “Элдик кеңеш” саясый партиясынын төрагасы Роза Нурматова да бар. УКМК анын жетекчилиги астында бийликти күч менен басып алуу пландарын талкуулоо менен мамлекеттик структураларга каршы аралашкан адамдарды үгүттөөгө багытталган жыйындар байма-бай өткөрүлүп келгенин билдирүүдө.
Мен Роза Зарлыковнаны көптөн бери билем, ал комсомолдук системада, андан кийин өкмөттө социалдык саясат бөлүмүнүн башчысы болуп иштеген. Аскар Акаевдин убагындагы мамлекеттик кызматтарда, ага чейин Апас Жумагуловдун, Турдакун Усубалиевдин кол алдында иштеген. Жалпысынан партиялык жана комсомолдук кызматкер.
Ал жакында Москвадан кайтып келди. Аны менен жолукканда, чындап эле иштеп, кайсы бир районду, шаарды өнүктүрүүнү өз мойнуна алгысы келерин айтты. Ичинде баары кайнап, энергия толуп турганын, көйгөйлөрдү чечүү боюнча жаңы көз караштарды байкадым. Анан ойлодум: эмнеге биздин бийликтегилер ушундай энергиялуу, максаттуу адамдарды жумушка тартпайт? Себеби, президент өзү деле квалификациялуу кадрлардын жетишсиздигин айтып жатпайбы. Ошентип мен кандайдыр бир жол менен бул идеяны жетекчиликке жеткире турган болдум. Анүстүнө Камчыбек Кыдыршаевич дагы, Садыр Нургожоевич дагы Роза Нурматованын кайраттуулугун, жигердүү турмуштук позициясын жакшы билишет.
Мына эми аны мамлекеттик төңкөрүш уюштурууга аракет кылганы үчүн камалганын көрүп жатабыз. Сыягы, анын жаркыраган энергиясы жана жигердүү жашоо позициясы көңүлүн калтырды. Ал ушундай жол менен бийликке келип, элдин жыргалчылыгы үчүн иштегиси келген окшойт. Башка оппозиционерлердин да ушундай амбициялары бар. Булардын арасында өтө акылдуу адистер, профессионалдар бар экенин дайыма байкап келем. Ошондуктан аларды мамлекеттик ишке тартуу зарыл. Болбосо, алардын энергиясы ашып-ташып, туруксуздукту жаратуучу күчкө алып келет. Ошондуктан мен бийликтин көңүлүн оппозицияга бургум келүүдө. Ошол эле «кемпирабадчылар», ошол эле Атай Бешенбек, Марат Баязов жана башкаларды кандайдыр бир жол менен активдүүлүгүн, жөндөмүн, тажрыйбасын жаратууга багытташ керек. Алар менен иштебесең, эл тынымсыз оппозицияга чыга бериши мүмкүн.
Бизде көйгөйлөрдү чечүү боюнча өз көз карашы, ойлору жана пландары бар адамдар көп. Маселен, социалдык тармактарда министрлер кабинетинин башчысы Акылбек Жапаровду сындап жүргөн бизнесмендерди билем. Аларды чакырып, угуп, мүмкүнчүлүктөрүн ачып беришибиз абзел. Кээде алар жетишерлик негиздүү сынды, баалуу кеп-кеңештерди айтып жатканын белгилей кеткен да оң. Дал ушул максатта мен Садыр Нургожоевичке, Камчыбек Кыдыршаевичке жана Акылбек Үсөнбековичке жеке кайрылып, “бийликти сындаган айрым адамдар менен иштешип, баарлашып, кеп-кеңештерин, ой-пикирлерин угуп көргүлө” дээр элем. Министрлер кабинетинин орун басары Эдил Байсалов деле ошондой адамдар менен жолугуп, керек болсо аларга белгилүү бир иш көлөмүн тапшырса болот да. Анан алар ошол жерде өздөрүнүн күчүн чачсын, билимин, уюштуруучулук жөндөмүн колдонушсун. Бийликти сындагандар, президенттин, министрлер кабинетинин, парламенттин саясатына нааразы болгондор, силер да белгилүү маселелерди чечүүнүн так аныкталган варианттарын сунуштасаңар, эл тараза болот эле. Ошондо силердин профессионалдык жөндөмүңөр, талантыңар элдин кызыкчылыгына багытталышы мүмкүн.
Негизинен бул багытта саясатты өзгөртпөсөк, бир-эки жылда бир төңкөрүш жасоого аракеттер боло берет. Кыргыздар улуттардын эң байыркы этносторуна киргендиктен, бизде көчмөн философиясы түптөлгөн жана региондогу башка өлкөлөрдөн байкаларлык айырмаланып турабыз. Башкача айтканда, ар бир адам коомду башкарууга жана өнүктүрүүгө салым кошкусу келет, колдон келишинче пайда алып келгенге умтулат. Муну эске алганыбыз жөндүү. Мисалы, атомдук станция бар, атомдук бомба бар, эгер энергияны позитивдүү колдонсоңуз, пайдалуу болот, болбосо жарылуу болушу мүмкүн...
