Марлен Маматалиевге караганда Талант Мамытов президентке ишенимдүү спикер болобу?
Президенттик шайлоо кийинки жылдын январь айында өтмөй болду. Конституциялык соттун билдирүүсү ушундай жарыяланды. Маанилүү жагдайга көңүл буралы. Талапкер катары Садыр Жапаров кызматын таштап, аламанга аттанганда, парламент спикери мамлекеттин “эки чылбыр бир тизгинин” колго алат. Мурдагы шайлоодо бул вазыйпаны Талант Мамытов аркалап, татыктуу түрдө милдетин аткарып, ишенимдүү жандооч болгон. Ал эми азыркы Жогорку Кеңештин төрагасы Марлен Маматалиев ойноп кетпейби? Кыска убакытта эле Алмазбек Атамбаевге, Өмүрбек Бабановго, Сокеге, Райымбек Матраимовго ооп кеткен, күч каякта болсо, ошол командага кире бергенин баарыбыз эле билебиз го? 2020-жылдагы Октябрь төңкөрүшүнөн кийин эки достун “чачпагын” көтөрүп чыга келди, аягында президенттин ишенимине арзып отурат. Балким, опурталдуу саясый жүрүштөрдө Марлен Маматалиев өз кызыкчылыгына карата саясатты алып кетсечи? Бул боюнча кыраакы аттуу-баштуулар да шек санай баштаганын угуп атабыз. Андыктан, спикерлик кызматка Талант Мамытовду эле шайлап, көңүлдү тынчытуу керекпи? Садыр Жапаров терең ойлонуп, өзүнө бекем таянычты тандайт (!) деп ишене туралы.
