Расул Умбеталиев, эксперт: «Энергетика системасы кыйроо абалына келди”
-- Министр Таалайбек Ибраев “быйылкы кыш эң оор болот” деди. Бул боюнча кандай ойдосуз?
-- Бул элди даярдоонун ордуна, коркутуу. Министр өзү мойнуна алып жатат да, “суу аз, электр жетишсиз” деп. Бирок 2023-жылы президент энергетикадагы өзгөчө кырдаал тууралуу указга кол койгон. Анда “элди үзгүлтүксүз камсыздоо министрдин жеке жоопкерчилиги” деп жазылган. Бирок көрүп жатабыз, эч нерсе аткарылган жок.
-- Токтогулдагы суунун көлөмү жашырылгандай…
-- Андан эмне пайда? Суу аз болсо, эл бары бир билип калат. “Халва” деп көп айтсаң деле жегендей болбойсуң да...
-- Министр жоопкерчиликтен качып жатабы?
– Ооба, алдын ала актануу. “Мен эскерткем” деп кутулуу аракети. Бирок суроо башкада: эмне үчүн ушундай абалга жеттик, ким күнөөлүү?
-- Импорт менен абал оңолобу?
-- Жок. Коңшулар да кышында өздөрүн араң камсыздайт. Алар бизге ашыгын гана берет. Ошондуктан бул маселе энергетика министрлигинин колунан чыгып, коопсуздук кеңешинин деңгээлине жетти.
-- Жакынкы жылдары өзгөрүү күтсөк болобу?
-- Тилекке каршы, жок. Стратегия да, так план да көрүнбөйт. Кичи ГЭСтер – бул жооткотуу. Маселе терең эле.
Өткөн жылы 3,6 миллиард кВт/саат болсо, быйыл 4,6 миллиард кВт/саат. Бул системанын кыйрашынан кабар берет.
-- Келерки жыл дагы оор болчудай го?..
-- 2026-жылдын апрелинде Токтогулда болгону 7 миллиард куб/метр суу калышы мүмкүн. Министр жооп бериши керек. Президенттин указы аткарылган жок!
"Азия Ньюс" гезити
