Динара Ашимова, ЖК депутаты: “Гимн маселесинде эксперттик пикирди угууга тийишпиз”
-- Динара айым, жакындан бери улуттук символдордун бири болгон гимнди өзгөртүү сунуштары айтыла баштады. Бул боюнча сиздин пикириңиз кандай?
-- Албетте, мындай учурларда коомчулуктагы пикирлерди эске алып, ошол эле учурда лингвисттерди угуш керек. Чын эле гимнди алмаштырыш керекпи, керек эмеспи? Биздин коом ушундайга өтүп, ар бир маселе боюнча эксперттик пикирди угууга тийишпиз. Эгер алар “мазмуну жакшынакай эле, өзгөртүүгө кажет жок” дешсе, ага макул бололу. “Жок, мобул жердеги сөзү туура эмес, алмаштырыш керек” десе, аны кароо кажет. “Кош маанилүү сөздөр бар” деген сыяктуу пикирлер айтылганын угуп калчумун алтынчы чакырылыштын депутаттарынан. Демек, маселе көтөрүлдүбү, ага өтө кесипкөй, компетенттүү адамдар баа берүүгө тийиш. Талкуудан соң, балким, бул маселе өзүнөн-өзү актуалдуу болбой калаар...
-- Эгер сиздерге ошондой сунуш келип, каралып калса, сиз кандай добуш бересиз?
-- Биз тууну өзгөртүп жатканда эле мен “баарын компекстүү карап, эгер зарылчылык болсо гимнди, гербди да өзгөртүш керек” деп айткам.
"Азия Ньюс" гезити
