Күйөөм башка аялга азгырылып, мен түшүнүксүз абалга кабылып отурам
Мен күйөөм менен он жылдан бери бирге өмүр кечирип келем. Бул жылдар аралыгында ачуу-таттууну тең бөлүшүп, кубанычты да, түйшүктү да чогуу көтөрдүк. Төрт балабыз бар, алар биздин үй-бүлөнүн маңызы, жашообуздун уландысы. Ушул он жыл ичинде көп нерсени баштан өткөрдүк, бирок азыркыдай оор, түшүнүксүз абалга биринчи жолу туш болуп отурам.
Жакында күйөөм Москвадан келди. Анын келиши менен кошо жүрөгүмө тынчтык бербеген бир чындык ачылды. Ал өзүнөн эки жаш улуу аял менен телефон аркылуу байланышып жүргөн экен. Күйөөм түз жолугушуу болбогонун айтат. Бирок бул сөздөр менин ичимдеги оор сезимди жеңилдете алган жок. Анткени мен үчүн ишеним үй-бүлөнүн пайдубалы. Ал солгундаса, калган нерселер да титирей баштайт.
Мени өзгөчө ойго салганы бул байланыш кокусунан эмес, күйөөмдүн жакын досу аркылуу уюштурулгандыгы болду. Ал адам мындай мамилелерге жеңил карап, бир гана менин күйөөмө эмес, башка досторуна да ушундай таанышууларды таап берип жүргөнү билинди. Ушуну ойлогондо, мындай жоопкерсиз мамиле канча үй-бүлөнүн тынчтыгына доо кетирип жатканын элестетип, жүрөгүм ооруйт.
Ал аялдын өзү да турмушта туруктуулугу жок, убактылуу мамилелерге көнүп калган адам экен. Бирок мен бул жерде кимдир бирөөнү күнөөлөп, айып издөөнү максат кылбайм. Мен үчүн эң башкысы өз үй-бүлөмдү сактап калуу, балдарымдын келечегин ойлоп, туура жана акылга сыярлык чечим кабыл алуу.
Азыр менин жандүйнөмдө суроолор көп. Ишенимди кайра калыбына келтирүүгө болобу? Бул сыноодон үй-бүлөбүз чыга алабы? Ушул суроолорго жооп издөө менен мен өзүмдүн да, балдарымдын да тагдырына жоопкерчилик менен карап турам.
Диана
