Караан туткан балдызымдын колун сурасамбы? Балама эне болсо...
Жубайым экөөбүз сүйлөшүп, жакшы тилектер менен баш кошконбуз. Эки жылдан кийин дарыланып жүрүп, кош бойлуу болду. Бирок, тилекке каршы, аялым төрөттөн каза болуп калды. Врачтар уулумду сактап, аялымды сактап кала алышпады. Беш айдан бери баламды балдызым карап жатат. Экөөбүз бир үйдө турабыз, тамагымды жасап берет, баламды өз апасындай кылып багат. Күйүмдүү кыз. Карап отуруп, “балдызыма үйлөнүп алсам кандай болот?” деген ойлор келчү болду. Бирок кайната, кайненем эмне дейт? Мага аялдан да биринчи баламды карай турган жакшы эне керек. Башка кыз алсам, ал апасындай карай алабы? А балдызым бир боору да, өз энесиндей болот эле болуп калды. Мага эми башкы орунда сүйүү сезими эмес, балам турат. Балдызым экөөбүздүн ортодо сезим ойгонуп кетээр. Бирок, ал турмушка чыккан эмес, бойдок. Мага макул болобу? Экөөбүз баш кошуп алсак, элдер эмне дейт? Кантип, ким аркылуу айтсам?..
Абай
"Азия Ньюс" гезити
