СССР учурунда балдарга камкордук көрүлсө, азыр кордолгондор көбөйүп кетти
Россиядагы жана башка өлкөлөрдөгү мигранттардын көпчүлүгү азап чегишип, кыйын абалда акча таап жүрүшөт. Алардын коопсуздугу, саламаттыгы да ойдогудай эмес. Учурда 90 миңге жакын балдардын ата-энелери чет өлкөлөрдө иштеп кетишкени кабарланды. А эсепке алынбагандары канча? Бул көрүнүш мамлекетибиздин келечеги үчүн да кооптуу. Ансыз да жакырчылыктан жабыркаган, же аракеч, оорулуу ата-энелердин балдары жетиштүү деңгээлде каралбайт. Замандын каатчылыгы, өнүгүүнүн чектелиши, кайдыгерликтин айынан келечегибизге балта чаап келатканыбызды байкабай, көңүл кош мамиле жасайбыз. Маселен, СССР учурунда ар бир балага камкордук көрүлүп, саламаттыгына, билим алуусуна шарттар түзүлүп, атургай жайкысын лагерлерге барууга милдеттендирилген. Эсил кайран коммунисттик доор келечекке чоң максат, жогорку идеология менен караган. Азыр эмне болдук? Өтө кейиштүү жагдайга тушугуп баратабыз. Өкмөт адатынча төш кагып, гүлдөп-өсүүнү айтат, а чыныгы турмушта кайгыга баткандар, келечеги кетменделип калгандар он миңдеп, жүз миңдеп саналып жатпайбы...
"Азия Ньюс" гезити
