“Ак-кула” ат майданына, №47 түрмө менен №1 СИЗОнун ордуна бак-дарактар тигилсе туура болмок
Кезектеги кейиштүү кербезби? “Ак-кула” ат майданына, №47 түрмө менен №1 СИЗОнун ордуна көп кабаттуу үйлөр курулат экен. Элге жеңилдетилген ипотекалык квартиралар берилери айтылууда. Албетте, назилинде тилек жакшы. Бирок буга чейинки Бишкек шаарындагы ыраатсыз салынган имараттар, үйлөр арбын эмеспи. Алардын көпчүлүгү архитектуралык талаптарга шайкеш келбейт, баягы тааныш аркылуу бизнес кылгандар. Машина токтотуучу жайлары, балдар ойноочу аянтчалары жетишсиз. Саркынды сууларды алып чыгуу да көйгөй жаратууда. Айтор, эптеп эле “чампаламай”. Бийик кабаттар башаламан көбөйүп, автоунаалар батпай, тыгын кыяматтай сезилип жатканда, дагы кысылышкан курулуштардын көбөйгөнү логикага сыябы? Ансыз да калааны кышкысын ыш-түтүн каптап, дем алууга мүмкүн эмес. Жайында чаң, таза аба дээрлик жетишсиз. Мындай шартта “Ак-кула” ат майданына, №47 түрмө менен №1 СИЗОнун ордуна бак-дарактар тигилсе, жакшылап өстүрүшсө, аба тазарат, элибиз сейилдейт. Ал эми ипотекалык үйлөр шаардын четине курулса ылайык болмок да, туурабы? Негизи арзан пиар, утурумдук упай алуу үчүн эле элди алаксыта беребизби? Качан келечектүү, кенен ойлонулган иш-пландар жүзөгө ашат? “Таз кейпибизден” арылбай калдык го...
"Азия Ньюс" гезити
