Президенттин рейтингин соцтармактардан жасалма түрдө көтөрүп атышабы?
Элдин басымдуу бөлүгү табиятынан оппозициялык маанайда болот эмеспи. Убакыт өткөн сайын бийликке каршы чыккандар арбып, кыйчалыш кырдаалдар жарала баштайт. Эң оболу, өкмөттүн ишмердиги начар болуп атса, бул жаатта абалды оңдош кыйын болору шексиз. Мындайда президент Сооронбай Жээнбековдун рейтингин түшүрбөй кармап туруу үчүн кошумча штабдардын иштеп атканы каңкууланып келет. Алардын иши кандай болушу мүмкүн? Адатта, президенттин артыкчылыктарын чагылдыруу, ишмердигин жайылтуу менен алек болушуп, ошого катар оппозицияга маалыматтык сокку жасап турушат. Негизинен мындай күрөш интернет айдыңында, дээрлик соцтармактарда орун алууда. Бирок, реалдуу ишке караганда дал ушундай пиар кампания убактылуу гана алаксытуу болуп калсачы? А эң олуттуу көрсөткүч – региондордогу, айылдардагы социалдык-экономикалык көйгөйлөрдү чечүү, карым-катышты күчөтүү, жергиликтүү лидерлер менен кызматташуу аркылуу президенттин беделин жогорулатса, мындай аракет түптүү болот. Ал эми соцтармактардан жасалма көрүнүштөр менен алдай берүү акыры жакшылыкка алпарбайт. Эмне үчүн Путин интернет айдыңынан сырткары Москвадан алыскы региондордогу, кыштактардагы элдин маанайына карап анализ кылат? Реалдуу көрсөткүчтү билүү үчүн да, туурабы? Биз да бул жагынан үлгү алышыбыз зарыл.
Aryba.kg