Чоң саясатта Темир Сариевдин экинчи деми ачылары байкалды
Өткөн ишемби күнү Темир Сариев “Соң-Көл” ресторанына түлөө берип, атасынын жүз жылдыгына куран окутту. Саясый элитадагы оппозиция менен позициясын аралаштырып, мындан сырткары ага-тууган, тели-теңтуштарынын баарын чогултту. Кыскасы, беш жүздөй адамга чай берди. Темикенин түлөөсү кабыл болсун! Биз бир нерсени белгилей кетели: соңку айларда тыңчыкмалар түрмөдөн шагырап эле чыгып атышат, алар мынчалык деңгээлде интеллигенцияны, саясатчыларды чакырып, бата алышкан жок. Темир Сариев бул жагынан өзгөчөлөнө алды. Себеби, жүзү жарык! Түрмөгө да Кумтөр ишине байланыштуу саясый негизде отуруп чыкканын айтууда. Башкалардай ооруп калып, же арызданбады. Убактылуу кыйынчылыкты чыныгы мырзадай көтөрүп, “былк” этпеген бекемдигин далилдеди. Демек, алдыдагы күрөштөрдө Темир мырзанын экинчи деми ачылары шексиз. Мындан ары активдүүлүгүн көрсөтүп, оппозициянын лидерине айланабы?
"Азия Ньюс" гезити
