Назарбаевдин саясый карьерасы Шекспирдин “Король Лириндей” аяктады...
Нуракенин саясый карьерасы Шекспирдин “Король Лириндей” аяктады. Король катары жашады жана иштеди: эгемен өлкөсүн көтөрдү, шаарларды, заводдорду, мектептерди, жолдорду курду. Айланасындагылардын баарын байытты, эли да коңшу өлкөлөрдүн калкына караганда жакшы жашашты. Бийликти шакиртине өткөрүп берип, эми гана карыган чагында “эс алайын” деди эле, ага коюшпады, ак сарайдагы интригалар элдин көкөйүнө тийди да, жасаган эмгектерин заматта четке чыгара коюшуп, “шал кет!” деп башташты. Жыйынтыгында, казактын “Король Лири” бийликтен, элдин урмат-сыйынан ажырап, жалгыз калды.
Мындай күтүүсүз кадам эрки күчтүү, эч убакта сынбачудай көрүнгөн Нуракени тил-ооздон калтырды. Ааламга батчудай болгон таарыныч экс-президенттин жүрөгүнө орноду. Карыбай тургандай болгон жаштардын “Шал кет, шал кет!” деген кыйкырыгы карыган арстандын кулагына жаңырык сыяктуу угулуп, ансайын жаратын сыйрып турары анык.
Ал бийликке элдин колу менен келди эле, бийликтен элдин колу менен кетти. Башкаруучу өз убагында канчалык жакшылык кылбасын, чыныгы ыраазычылыкты өлгөндөн кийин гана алат.
